मुगु र बाजुराका दुर्गम बस्तीमा नेपाल टेलिकमको फोरजी सेवा विस्तार

1.2k Shares

काठमाडौं । नेपाल टेलिकमले मुगु र बाजुराका दुर्गम हिमाली बस्तीमा फोरजी (4G) सेवा विस्तार गरेको छ। टेलिकमले मुगुको सोरु गाउँपालिका–६ सोरुकोट तथा बाजुराको हिमाली गाउँपालिका–१ बिच्छ्याको नेटा र वडा नं. ५ कुवाडी क्षेत्रमा फोरजी सेवा सञ्चालनमा ल्याएको जनाएको छ।

सोरुकोटमा आयोजित सेवा शुभारम्भ कार्यक्रममा स्थानीय जनप्रतिनिधि, सरकारी निकायका प्रतिनिधि, नेपाल टेलिकमका प्राविधिक कर्मचारी तथा स्थानीयवासीको सहभागिता रहेको थियो।

कार्यक्रममा सोरु गाउँपालिकाका अध्यक्ष धर्मबहादुर शाही र उपाध्यक्ष केशरबहादुर शाहीले दुर्गम क्षेत्रमा आधुनिक दूरसञ्चार सेवा विस्तार हुनु स्थानीय नागरिकका लागि ऐतिहासिक उपलब्धि भएको बताए। उनीहरूले सेवाको दिगो सञ्चालन, संरक्षण तथा आवश्यकताअनुसार क्षमता विस्तारका लागि गाउँपालिकाले आवश्यक समन्वय र सहयोग गर्ने प्रतिबद्धता व्यक्त गरे।

नेपाल टेलिकमका अनुसार बिच्छ्याको नेटामा जडान गरिएको फोरजी टावरबाट कोट, नेटा, बाम, बौडी, यौना, नातीखोला आसपासका बस्ती तथा गुम्बासम्म सेवा पुगेको छ। साथै बाजुराबाट रानिसैन पुग्ने पदमार्गसम्म पनि फोरजी सेवाको पहुँच विस्तार भएको छ।

त्यसैगरी कुवाडी क्षेत्रमा सञ्चालनमा आएको फोरजी सेवाले आसपासका गाउँ तथा हुम्लाको ताँजाकोट गाउँपालिका–२ जाने मार्गसमेत समेटेको टेलिकमले जनाएको छ।

फोरजी सेवा सञ्चालनसँगै स्थानीयवासीले उच्च गतिको मोबाइल इन्टरनेट, गुणस्तरीय भ्वाइस सेवा र एसएमएस सेवाको सहज उपयोग गर्न सक्नेछन्। यसबाट सूचना, शिक्षा, स्वास्थ्य, सरकारी सेवा तथा स्थानीय आर्थिक–सामाजिक विकासमा सकारात्मक योगदान पुग्ने अपेक्षा गरिएको छ।

नेपाल टेलिकमले ‘राष्ट्रको सञ्चार’ भन्ने प्रतिबद्धताअनुरूप देशका सुगमदेखि अतिदुर्गम क्षेत्रसम्म अत्याधुनिक दूरसञ्चार सेवा र सूचना प्रविधिको पहुँच विस्तार गर्ने अभियानलाई निरन्तरता दिएको जनाएको छ।

सम्बन्धित समाचार