मधेशका सबै जिल्लाबाट हटे निषेधाज्ञा र कर्फ्यु; जनजीवन सामान्य बन्दै

1.5k Shares

काठमाडौं । मधेश प्रदेशका विभिन्न जिल्लामा साम्प्रदायिक तनाव र आन्दोलनका कारण लागू गरिएका निषेधाज्ञा तथा कर्फ्यु अब पूर्ण रूपमा हटाइएका छन्। सोमबार बिहानदेखि धनुषाको जनकपुरधाम क्षेत्रमा पनि निषेधाज्ञा हटाइएसँगै प्रभावित सबै जिल्लामा जनजीवन क्रमशः सामान्य अवस्थामा फर्किन थालेको छ।

जिल्ला प्रशासन कार्यालय धनुषाले प्रमुख जिल्ला अधिकारी प्रेमप्रसाद लुइटेलद्वारा जारी सूचनामार्फत साउन १८ गते बिहान ५ बजेदेखि निषेधाज्ञा पूर्ण रूपमा हटाइएको जनाएको छ। प्रशासनका अनुसार आन्दोलनरत पक्षले आफ्ना सबै आन्दोलनका कार्यक्रम फिर्ता लिएको, जिल्लाको सुरक्षा अवस्था सुधारोन्मुख रहेको तथा जिल्ला सुरक्षा समितिको सिफारिसका आधारमा निषेधाज्ञा हटाउने निर्णय गरिएको हो।

यसअघि साउन १६ गतेदेखि स्थानीय प्रशासन ऐन, २०२८ अनुसार जनकपुरधाम उपमहानगरपालिका र आसपासका क्षेत्रमा निषेधाज्ञा लागू गरिएको थियो। धनुषामा निषेधाज्ञा हटेसँगै यसअघि कर्फ्यु वा निषेधाज्ञा लागू भएका मधेश प्रदेशका अन्य जिल्लामा पनि प्रतिबन्धात्मक आदेश हटिसकेका छन्।

आन्दोलनका क्रममा प्रभावित सप्तरी, सिराहा, धनुषा र सुनसरी लगायतका क्षेत्रमा अहिले यातायात, बजार, शैक्षिक संस्था तथा सरकारी कार्यालयहरू नियमित रूपमा सञ्चालन हुन थालेका छन्।

प्रशासनका अनुसार सुरक्षा निकायले अझै पनि संवेदनशील क्षेत्रको निगरानीलाई निरन्तरता दिएको छ। सम्भावित अप्रिय घटना रोक्न नेपाल प्रहरी, सशस्त्र प्रहरी बल र स्थानीय प्रशासन सतर्क अवस्थामा रहे पनि सर्वसाधारणको दैनिक जीवन भने सामान्य बन्दै गएको छ।

यसबीच आन्दोलनरत पक्ष र सरकारबीच भएका सहमति कार्यान्वयनको प्रक्रिया अघि बढिरहेको जनाइएको छ। प्रशासनले सबै पक्षलाई सामाजिक सद्भाव, धार्मिक सहिष्णुता र कानुनी शासनको सम्मान गर्दै शान्तिपूर्ण वातावरण कायम राख्न आग्रह गरेको छ।

निषेधाज्ञा र कर्फ्यु हटाइएसँगै मधेश प्रदेशमा सार्वजनिक सवारीसाधन नियमित सञ्चालनमा आएका छन् भने व्यापार–व्यवसाय, सरकारी सेवा, बैंक तथा वित्तीय संस्था र अन्य सार्वजनिक गतिविधि पनि सहज बन्दै गएका छन्। स्थानीयवासीमा पनि त्रास घट्दै गएको र जनजीवन क्रमशः सामान्य लयमा फर्किन थालेको प्रशासनको भनाइ छ।

सम्बन्धित समाचार