काठमाडौं । जाजरकोटका प्रहरी कार्यालय तथा स्थानीय तहलाई २१ लाख रुपैयाँभन्दा बढी मूल्यका विपद् उद्धार तथा राहत सामग्री हस्तान्तरण गरिएको छ।
विपद्का बेला उद्धार, राहत तथा आपत्कालीन व्यवस्थापनलाई प्रभावकारी बनाउने उद्देश्यले नेपाल रेडक्रस सोसाइटी, जाजरकोट शाखाले जिल्ला प्रहरी कार्यालय तथा विभिन्न स्थानीय तहलाई २१ लाख रुपैयाँभन्दा बढी मूल्यका सामग्री उपलब्ध गराएको हो।
हस्तान्तरण गरिएका सामग्रीमा त्रिपाल, कम्बल, भान्साका सामग्री, सरसफाइ सामग्री, आपत्कालीन राहत सामग्रीलगायत विपद् व्यवस्थापनमा आवश्यक सामग्री समावेश छन्। यस्ता सामग्रीले बाढी, पहिरो, भूकम्प तथा अन्य प्राकृतिक विपद्का बेला तत्काल राहत र उद्धार कार्यलाई सहज बनाउने अपेक्षा गरिएको छ।
सामग्री हस्तान्तरण कार्यक्रममा स्थानीय जनप्रतिनिधि, सुरक्षा निकायका अधिकारी तथा सरोकारवालाले विपद्को समयमा प्रभावकारी समन्वय र पूर्वतयारीको आवश्यकता औँल्याएका थिए। उनीहरूले यस्ता सहयोगले स्थानीय तह र सुरक्षा निकायको विपद् प्रतिकार्य क्षमता थप सुदृढ हुने विश्वास व्यक्त गरेका छन्।
जाजरकोट भूकम्पपछि विपद् जोखिम न्यूनीकरण, राहत व्यवस्थापन र पूर्वतयारीलाई प्राथमिकतामा राख्दै विभिन्न निकायले सहयोग तथा क्षमता अभिवृद्धिका कार्यक्रमलाई निरन्तरता दिँदै आएका छन्।