बागमती प्रदेशका मुख्यमन्त्री इन्द्रबहादुर बानियाँले आज प्रदेशसभाबाट विश्वासको मत लिँदैछन्। प्रदेशसभाको बैठकमा उनले विश्वासको मतसम्बन्धी प्रस्ताव पेस गर्ने कार्यसूची रहेको छ।
सरकारमा सहभागी नेकपा एमालेले साउन ६ गते समर्थन फिर्ता लिएपछि मुख्यमन्त्री बानियाँ अल्पमतमा परेका हुन्। संवैधानिक व्यवस्थाअनुसार समर्थन फिर्ता लिएको ३० दिनभित्र मुख्यमन्त्रीले प्रदेशसभाबाट विश्वासको मत लिनुपर्ने हुन्छ।
१०४ सदस्य कायम रहेको बागमती प्रदेशसभामा सरकार जोगाउन कम्तीमा ५३ सांसदको समर्थन आवश्यक पर्छ। कांग्रेससँग ३६, नेकपासँग २६ र एमालेसँग २५ सांसद छन्। यस्तै राप्रपाका १२, नेमकिपाका ३ र हाम्रो नेपाली पार्टीका २ सांसद छन्।
मुख्यमन्त्री बानियाँले विश्वासको मत प्राप्त गर्न साना दलहरूको समर्थन जुटाउने प्रयास गरिरहेका छन्। विशेषगरी राप्रपा र नेमकिपाको समर्थन निर्णायक बन्न सक्ने देखिएको छ। विश्वासको मत प्राप्त गर्न नसके संवैधानिक व्यवस्थाअनुसार उनी मुख्यमन्त्री पदबाट मुक्त हुनेछन्।