लगातार २७ बैठकमा अनुपस्थित भएपछि कांग्रेस सांसद प्रकाश देउवा पदमुक्त
1.3k
Shares
धनगढी । नेपाली कांग्रेसका सुदूरपश्चिम प्रदेशसभा सदस्य प्रकाशबहादुर देउवा पदमुक्त भएका छन् । प्रदेशसभा बैठकमा लामो समयसम्म अनुपस्थित भएपछि सभामुख भीमबहादुर भण्डारीले उनलाई पदमुक्त गर्ने निर्णय गरेका हुन् ।
प्रदेशसभा सचिवालयका सचिव देवबहादुर बोगटीका अनुसार कुनै जानकारी नदिई लगातार २७ वटा बैठकमा अनुपस्थित रहेपछि संविधानको धारा १८० को (घ) अनुसार देउवालाई पदमुक्त गरिएको हो ।
देउवा विगत ११ महिनादेखि अमेरिकामा रहेको प्रदेशसभा सचिवालयले जनाएको छ । लामो समयसम्म प्रदेशसभा बैठकमा अनुपस्थित भए पनि उनले आफ्नो अनुपस्थितिबारे प्रदेशसभा सचिवालयलाई औपचारिक जानकारी गराएका थिएनन् ।
यसअघि पनि देउवा लामो समयदेखि प्रदेशसभा बैठकमा अनुपस्थित रहेको विषय सार्वजनिक भएको थियो । केही महिनाअघि सार्वजनिक विवरणअनुसार उनी अमेरिकामा रहे पनि पार्टी, प्रदेशसभा र प्रदेश सरकारलाई आफ्नो अवस्थाबारे औपचारिक जानकारी दिएका थिएनन् ।
सुदूरपश्चिम प्रदेशसभा नियमावलीअनुसार लामो समयसम्म बिना सूचना बैठकमा अनुपस्थित रहने सांसदको पद रिक्त हुन सक्ने व्यवस्था छ । यही कानुनी व्यवस्थाका आधारमा सभामुखले देउवालाई पदमुक्त गर्ने निर्णय गरेका हुन् ।
प्रकाश देउवा २०७९ को प्रदेशसभा निर्वाचनमा कैलाली क्षेत्र नम्बर ५ (२) बाट निर्वाचित भएका थिए । उनी सुदूरपश्चिम प्रदेश सरकारमा भौतिक पूर्वाधार विकासमन्त्रीसमेत भइसकेका छन् ।
देउवा लामो समयसम्म अनुपस्थित भएपछि उनको प्रदेशसभा सदस्य पद नै कायम रहने वा नरहने विषयमा यसअघि पनि चर्चा हुँदै आएको थियो । अहिले भने प्रदेशसभा सचिवालयले संविधानको व्यवस्था प्रयोग गर्दै औपचारिक रूपमा पदमुक्त गरेको हो ।
यस घटनासँगै कांग्रेसको सुदूरपश्चिम प्रदेशसभामा एक सांसदको पद रिक्त भएको छ । आगामी प्रक्रियाअनुसार उक्त रिक्त पदका सम्बन्धमा निर्वाचन आयोग तथा सम्बन्धित निकायबाट आवश्यक प्रक्रिया अघि बढ्नेछ।