बेवारिसे शव व्यवस्थापनबारे बालेनले के भने

1.4k Shares

काठमाडौँ । प्रधानमन्त्री बालेन्द्र शाह (बालेन) ले रसुवा भोटेकोशी बाढीपछि फेला परेका पहिचान खुल्न नसकेका शवलाई डीएनएलगायत पहिचान खुलाउन सकिने आधार सुरक्षित राखेर मात्र व्यवस्थापन गरिएको बताएका छन्।

प्रधानमन्त्री शाहका अनुसार पहिचान भएका शवहरू सम्बन्धित परिवारलाई जिम्मा लगाउने काम भइरहेको छ भने पहिचान हुन नसकेका शवलाई कानुनी प्रक्रिया पूरा गरी जमिनमुनि व्यवस्थापन गर्न थालिएको हो।

उनले ‘पहिचान नभएका तथा बेवारिसे शव व्यवस्थापन (पहिलो संशोधन) निर्देशिका, २०८३’ अनुसार शव व्यवस्थापन भइरहेको स्पष्ट पारेका छन्। गृह मन्त्रालयले पनि उक्त संशोधित निर्देशिका सार्वजनिक गरेको छ।

बालेनले पहिचान नखुलेका शवलाई त्यसैगरी अन्त्य नगरेको स्पष्ट पार्दै भनेका छन्—शवबाट डीएनए तथा भविष्यमा पहिचान गर्न सहयोग पुग्ने अन्य आधारहरू सुरक्षित राखिन्छन्। त्यसैले पछि कुनै परिवारले आफ्नो आफन्त भएको दाबी गरेमा वैज्ञानिक परीक्षणमार्फत पहिचान गर्न सकिने सरकारी भनाइ छ।

प्रधानमन्त्रीका अनुसार बाढीबाट प्रभावित विभिन्न आठ जिल्लामा सयौँ शव फेला परेका छन्। शव लामो समय राख्दा कुहिने, दुर्गन्ध फैलिने तथा संक्रमण र महामारीको जोखिम बढ्ने भएकाले व्यवस्थापनको प्रक्रिया अघि बढाइएको हो।

यसअघि चितवनमा सङ्कलित पहिचान नखुलेका शवमध्ये केहीलाई डीएनए नमुना र आवश्यक विवरण सुरक्षित राखेर जमिनमुनि व्यवस्थापन गर्ने निर्णय गरिएको थियो।

सरकारको दाबीअनुसार यो स्थायी रूपमा पहिचानको सम्भावना बन्द गर्ने प्रक्रिया होइन; भविष्यमा पहिचान खुल्न सक्ने आधार सुरक्षित राखेर तत्कालको शव व्यवस्थापन गर्ने प्रक्रिया हो।

 
 
 
सम्बन्धित समाचार