पूर्णबहादुर र शेखरलाई मिलाउन संस्थापन पक्ष सकारात्मक
1.5k
Shares
काठमाडौं, भदौ २२ । नेपाली कांग्रेसभित्र देखिएको आन्तरिक विवाद समाधान गरी पार्टीलाई एकताबद्ध बनाएर १५औँ महाधिवेशनमा लैजाने प्रयास तीव्र बनेको छ। पार्टी सभापति गगन थापाले संस्थापनइतर पक्षका प्रभावशाली नेता निवर्तमान कार्यवाहक सभापति पूर्णबहादुर खड्का र नेता डा. शेखर कोइरालासँग संवाद अघि बढाएपछि संस्थापन पक्ष उनीहरूले उठाएका अधिकांश माग सम्बोधन गर्न सकारात्मक देखिएको हो।
सभापति थापाले पछिल्ला दिनमा खड्का र कोइरालासँग छुट्टाछुट्टै छलफल गरेका छन्। पार्टीभित्रको विवाद अन्त्य गर्दै महाधिवेशनको वातावरण बनाउन संस्थापन पक्षले लचकता अपनाउने संकेत दिएको छ। महामन्त्री प्रदीप पौडेलले पनि खड्का र कोइरालाले उठाउँदै आएका माग सम्बोधन गरेर पार्टी एकता कायम गर्न आफूहरू तयार रहेको बताएका छन्।
संस्थापन पक्षले विशेषगरी क्रियाशील सदस्यता अद्यावधिक र महाधिवेशन तयारीसँग सम्बन्धित विषयमा सहमतिको वातावरण बनाउन खोजेको छ। गत पुस १० गतेसम्म क्रियाशील सदस्यता नवीकरण गरेका सदस्यलाई १५औँ महाधिवेशनमा सहभागी हुन दिने विषयमा संस्थापन पक्ष सकारात्मक भएको छ। यसअघि अद्यावधिक नगरेका सदस्यलाई महाधिवेशनमा सहभागी गराउन नहुने तयारी कांग्रेसले गरेको थियो।
खड्का र कोइरालाले पुस १० गतेसम्म नवीकरण गरेका क्रियाशील सदस्यलाई कुनै अतिरिक्त सर्तबिना महाधिवेशनमा सहभागी गराउनुपर्ने माग राख्दै आएका थिए। संस्थापन पक्षले यो माग स्वीकार गर्ने संकेत दिएसँगै पार्टीभित्र लामो समयदेखि जारी विवाद केही साँघुरिने अपेक्षा गरिएको छ।
त्यस्तै, महाधिवेशनलाई निष्पक्ष र विश्वसनीय बनाउन विभिन्न समितिमा सबै पक्षको प्रतिनिधित्व गराउने विषयमा पनि संस्थापन पक्ष सकारात्मक देखिएको छ। क्रियाशील सदस्यता छानबिन समिति, केन्द्रीय निर्वाचन समिति, अनुशासन समिति र विधान संशोधन समितिमा सबै पक्षका प्रतिनिधि समेट्ने प्रस्ताव अघि सारिएको छ।
नेता डा. शेखर कोइरालाले यसअघि पार्टी एकताका लागि पाँचबुँदे प्रस्ताव अघि सारेका थिए। संस्थापन पक्षले पहिले स्वीकार गर्न अनिच्छा देखाएको उक्त प्रस्तावका अधिकांश विषय अहिले स्वीकार गर्न तयार भएको बताइएको छ। महाधिवेशनको तयारीका लागि छुट्टै संयन्त्र गठन गरी त्यसको नेतृत्व कोइरालालाई दिने विषयमा समेत छलफल भएको छ।
प्रस्तावित संयन्त्रमा संस्थापन पक्षबाट आठ जना र संस्थापनइतर पक्षबाट छ जना सदस्य राख्ने प्रस्ताव सभापति थापाले कोइरालासमक्ष राखेका छन्। उक्त संयन्त्रलाई महाधिवेशनको तयारीसँग सम्बन्धित कामको जिम्मेवारी दिने र त्यसलाई केन्द्रीय कार्यसमितिबाट अनुमोदन गरेर अघि बढाउने तयारी छ।
पूर्णबहादुर खड्का पनि संस्थापन पक्षले एकताका लागि लचकता देखाए सकारात्मक रूपमा अघि बढ्न तयार रहेको उनीनिकट नेताहरूले बताएका छन्। खड्का र कोइरालाले महाधिवेशन प्रक्रियालाई एकतापूर्वक अघि बढाउने पक्षमा सकारात्मक संकेत दिए पनि त्यसका लागि थप प्रत्यक्ष संवाद आवश्यक रहेको उनीहरूको भनाइ छ।
यसैबीच कांग्रेसले वडा अधिवेशनको कार्यतालिका केही पर सार्ने तयारी गरेको छ। विपद्को अवस्था र पार्टीभित्र एकताको प्रयासलाई ध्यान दिँदै वडा अधिवेशन भदौ २४ गतेबाट केही दिन पछि सार्ने तयारी गरिएको हो। यद्यपि केन्द्रीय महाधिवेशन भने असोज १६ देखि १९ गतेसम्म काठमाडौंमा गर्ने कार्यतालिका यथावत् राख्ने तयारी छ।
कांग्रेसभित्र पूर्णबहादुर खड्का र शेखर कोइराला पक्षसँग सहमतिको वातावरण बन्दै गए पनि निवर्तमान सभापति शेरबहादुर देउवा पक्षसँग भने अझै सहमति जुट्न सकेको छैन। देउवा पक्षले सर्वोच्च अदालतमा विचाराधीन पुनरावलोकनको विषय टुंगो नलागेसम्म महाधिवेशन अघि बढाउन नहुने अडान राख्दै आएको छ।
यसरी कांग्रेसको संस्थापन पक्ष खड्का र कोइरालाका मागमा क्रमशः लचक बन्दै गएपछि पार्टीभित्रको विवाद समाधान हुने सम्भावना बढेको छ। अब देउवा पक्षसँग पनि सहमति जुटाउन सके कांग्रेसले विभाजनको सम्भावना टार्दै एकतापूर्वक १५औँ महाधिवेशन सम्पन्न गर्ने बाटो खुल्ने देखिएको छ।