काठमाडौं । रसुवा र नुवाकोटमा बाढीपहिरोबाट प्रभावित नागरिकले सरकारले राहतका नाममा दाल, चामललगायत खाद्यान्नमा मात्र ध्यान दिएको गुनासो गरेका छन्। विपद्पछि आफूहरूका समस्या फरक–फरक भए पनि सरकारले सबैलाई एउटै ढाँचामा राहत वितरण गरिरहेको उनीहरूको भनाइ छ।
बाढीपहिरोका कारण घरबार गुमाएका, आफन्त बेपत्ता भएका तथा जीविकोपार्जनका साधन नष्ट भएका परिवारलाई तत्काल खाद्यान्नसँगै अन्य आवश्यक सहयोगको समेत आवश्यकता रहेको प्रभावितहरूको भनाइ छ। उनीहरूले दीर्घकालीन पुनःस्थापना र जीविकोपार्जनको व्यवस्था गर्न सरकारसँग माग गरेका छन्।
प्रभावित क्षेत्रमा सडक, पुल, घर तथा अन्य भौतिक संरचनामा क्षति पुगेको छ। कतिपय परिवार आफ्ना आफन्तको खोजी र पुनःस्थापनाको पर्खाइमा छन् भने कतिपयले रोजगारी तथा आयआर्जनको आधार गुमाएका छन्।
पीडितहरूले आफ्नो वास्तविक आवश्यकता पहिचान गरेर राहत तथा पुनःस्थापनाका कार्यक्रम सञ्चालन गर्नुपर्ने बताएका छन्। एउटै प्रकारको राहतले सबै प्रभावितको समस्या समाधान नहुने भन्दै उनीहरूले स्थानीय तहसँग समन्वय गरी व्यक्ति तथा परिवारको अवस्थाअनुसार सहयोग उपलब्ध गराउन माग गरेका छन्।
विपद्पछि तत्कालीन राहतसँगै प्रभावित क्षेत्रको पुनर्निर्माण, घरबासको व्यवस्था, रोजगारी सिर्जना र जीविकोपार्जन पुनःस्थापनालाई प्राथमिकता दिनुपर्ने आवाज उठिरहेको छ।