मेरी स्लसरले नेपालका कला–सम्पदा तस्करी गरेको खुलासा
869
Shares
काठमाडौं । अमेरिकी मानवशास्त्री मेरी स्लसरले नेपालमा अध्ययनका क्रममा करिब ५ सय पुरातात्त्विक तथा सांस्कृतिक वस्तु संकलन गरी अवैध रूपमा विदेश लगेको विषय सार्वजनिक भएको छ।
स्लसर नेपालमा लामो समय बसेर नेपाली कला, वास्तुकला, संस्कृति र सम्पदाबारे अध्ययन गरेकी थिइन्। उनको अध्ययनका क्रममा काठमाडौं उपत्यकाबाट विभिन्न कलाकृति तथा सम्पदा संकलन गरिएको र तीमध्ये धेरै वस्तु विदेश पुगेको विवरण सार्वजनिक भएको हो।
उनी स्मिथसोनियनसँगको अनुसन्धानसम्बन्धी काममा नेपाल आएकी थिइन्। नेपालमा रहँदा उनले संकलन गरेका सामग्रीमध्ये ठूलो हिस्सा अमेरिकास्थित संग्रहालय तथा संस्थाहरूमा पुगेको बताइएको छ।
स्लसरले नेपाली कला तथा सम्पदाको अध्ययनमा महत्वपूर्ण योगदान पुर्याएकी थिइन्। उनले काठमाडौं उपत्यकाको कला, वास्तुकला, भाषा तथा सांस्कृतिक इतिहाससम्बन्धी अनुसन्धान र पुस्तकसमेत प्रकाशित गरेकी छन्। पछि पाटन संग्रहालयको स्थापना तथा व्यवस्थापनमा समेत उनको भूमिका रहेको उल्लेख छ।
तर, नेपाली सांस्कृतिक सम्पदा विदेश पुर्याइएको विषयमा पछिल्लो खुलासाले अनुसन्धानका नाममा संकलन गरिएका ऐतिहासिक वस्तुको स्वामित्व, निर्यात प्रक्रिया र संरक्षणसम्बन्धी प्रश्न पुनः उठाएको छ। नेपालबाट विभिन्न समयमा हराएका तथा विदेशका संग्रहालयमा पुगेका कलाकृतिको पहिचान र फिर्तीको विषय लामो समयदेखि चर्चामा रहँदै आएको छ।