संसद्का दुवै सदनको बैठक आज, यस्तो छ कार्यसूची

1.3k Shares

काठमाडौं । संघीय संसद्का दुवै सदनको बैठक शुक्रबार बस्दै छ। प्रतिनिधिसभाको बैठक बिहान ११ बजे र राष्ट्रियसभाको बैठक दिउँसो १ः१५ बजे सिंहदरबारमा बस्ने कार्यसूची छ।

प्रतिनिधिसभाको बैठकमा सभामा प्रस्तुत हुन नसकेका मौखिक तथा लिखित प्रश्नका उत्तर सम्बन्धित मन्त्रीहरूले टेबुल गर्नेछन्। प्रधानमन्त्री वालेन्द्र शाहका तर्फबाट कानुन, न्याय तथा संसदीय मामिलामन्त्री सोविता गौतमले राष्ट्रिय प्राकृतिक स्रोत तथा वित्त आयोगको आठौँ वार्षिक प्रतिवेदन, २०८३ पेस गर्ने कार्यसूची छ।

मन्त्री गौतमले नै केही नेपाल ऐनको व्यवस्था जगाउने विधेयक, २०८३ र राष्ट्रिय प्रतिरक्षा विश्वविद्यालय विधेयक, २०८३ लाई दफावार छलफलका लागि सम्बन्धित समितिमा पठाउने प्रस्ताव प्रस्तुत गर्नेछिन्।

यस्तै, पूर्वाधार विकासमन्त्री सुनील लम्सालले फोहरमैला व्यवस्थापन विधेयक, २०८३ लाई दफावार छलफलका लागि समितिमा पठाउने प्रस्ताव राख्नेछन्।

महिला, बालबालिका, लैङ्गिक तथा यौनिक अल्पसङ्ख्यक र सामाजिक सुरक्षामन्त्री सीता बादीले सम्बन्धित केही नेपाल ऐन संशोधन गर्ने विधेयकलाई समितिमा पठाउने प्रस्ताव प्रस्तुत गर्ने कार्यक्रम छ।

स्वास्थ्य तथा खाद्य स्वच्छतामन्त्री निशा मेहताले आमाको दूधलाई प्रतिस्थापन गर्ने वस्तु बिक्री वितरण नियन्त्रण, सुरक्षित मातृत्व तथा प्रजनन स्वास्थ्य अधिकार, स्वास्थ्यकर्मी तथा स्वास्थ्य संस्थाको सुरक्षासम्बन्धी र रामराजाप्रसाद सिंह स्वास्थ्य विज्ञान प्रतिष्ठानसम्बन्धी विधेयकलाई दफावार छलफलका लागि समितिमा पठाउने प्रस्ताव प्रस्तुत गर्नेछिन्।

आजकै बैठकमा संवैधानिक निकायका पदाधिकारीहरूको पारिश्रमिक, सेवाको शर्त र सुविधासम्बन्धी पहिलो संशोधन विधेयक पारित गर्ने कार्यसूची पनि छ। सभामुख डोलप्रसाद अर्यालले १० वा सोभन्दा बढी बैठकमा अनुपस्थित सांसदको अनुपस्थितिसम्बन्धी सूचना सभाको स्वीकृतिका लागि पेस गर्नेछन्।

राष्ट्रियसभाको बैठकमा प्रतिनिधिसभाबाट संशोधनसहित फिर्ता आएको राष्ट्रिय विधि विज्ञान प्रयोगशाला (स्थापना र सञ्चालन) विधेयक, २०८१ माथि प्रतिनिधिसभाबाट भएको संशोधनलाई सहमति गरियोस् भन्ने प्रस्ताव पेस हुनेछ।

त्यसैगरी, राष्ट्रियसभाको बैठकमा आन्तरिक वायु सेवाको दायित्वसम्बन्धी विधेयक, २०८३ पारित गर्ने कार्यसूची रहेको छ।

सम्बन्धित समाचार