सुर्खेत । प्रशोधित पिउने पानीको अधिकतम खुद्रा मूल्य (एमआरपी) निर्धारण गर्ने विषयमा सुर्खेतमा विवाद उत्पन्न भएको छ । जिल्ला प्रशासन कार्यालय सुर्खेतले पानीको मूल्यसम्बन्धी निर्देशनबाट पछि हट्दै यसअघि कायम रहेको मूल्यलाई नै निरन्तरता दिएको छ ।
वीरेन्द्रनगरस्थित अशोका होटलमा प्रशोधित पिउने पानी (जार तथा बोतल) को मूल्यसम्बन्धी विषयमा छलफल भएपछि प्रमुख जिल्ला अधिकारी महेन्द्रकुमार सापकोटा आफ्नो पूर्वनिर्देशनबाट पछि हटेका हुन् । पानीको मूल्य निर्धारण र कार्यान्वयनका विषयमा सरोकारवाला पक्षबीच मतभेद देखिएपछि पुरानै मूल्य कायम गर्ने निर्णय भएको हो ।
सरकारले निर्धारण गरेको मूल्यअनुसार काठमाडौं उपत्यकाबाहिर एक लिटर बोतलको पानीको अधिकतम खुद्रा मूल्य २० रुपैयाँ र २० लिटरको जारको पानीको मूल्य ६० रुपैयाँ तोकिएको छ । काठमाडौं उपत्यकामा भने एक लिटर बोतलको पानी १६ रुपैयाँ र २० लिटरको जारको पानी ४७ रुपैयाँ कायम छ ।
उपभोक्ताले तोकिएको मूल्यमा गुणस्तरीय पानी पाउनुपर्ने माग गर्दै आएका छन् भने मूल्य निर्धारणसम्बन्धी निर्णय कार्यान्वयनमा स्पष्टता आवश्यक देखिएको छ ।