काठमाडौं। प्रधानमन्त्री बालेन्द्र शाह र नेपाली कांग्रेसका सभापति गगन थापाबीच सामाजिक सञ्जालमा देखिएको आरोप–प्रत्यारोपले नेपाली राजनीतिमा नयाँ तरंग पैदा गरेको छ। दुई नेताबीच सार्वजनिक रूपमा देखिएको अभिव्यक्तिको टकरावले सरकार र प्रमुख प्रतिपक्षी दलबीचको सम्बन्ध थप तनावपूर्ण बन्न सक्ने संकेत गरेको छ।
केही दिनअघि प्रधानमन्त्री शाहले सामाजिक सञ्जालमा ‘सही समय आएपछि सबैको गलत समय आउँछ, एक–दुई जना उम्किन्छु भनेर सपना नदेखे हुन्छ’ भन्दै चेतावनीपूर्ण अभिव्यक्ति दिएका थिए।
प्रधानमन्त्रीको उक्त अभिव्यक्तिलाई आफू लक्षित ठानेर कांग्रेस सभापति थापाले पनि जवाफ फर्काएका थिए। उनले सामाजिक सञ्जालमा ‘तर्साउने धेरै आए, तर्सिने बानी परेन’ भन्दै प्रतिक्रिया दिएका थिए।
दुई नेताबीचको यो अभिव्यक्ति आदानप्रदानलाई सामान्य सामाजिक सञ्जालको बहसभन्दा पनि सरकार र प्रतिपक्षबीच बढ्दै गएको राजनीतिक दूरीका रूपमा हेरिएको छ।
यसैबीच, कांग्रेसभित्र सरकारविरुद्ध सडक आन्दोलनमा उत्रिने विषयमा आन्तरिक तयारी तीव्र भएको बताइएको छ। सभापति थापाले कुनै पनि दबाब र धम्कीबाट पछि नहट्ने संकेत दिएपछि सरकार र कांग्रेसबीचको राजनीतिक सम्बन्ध थप जटिल बन्न सक्ने देखिएको छ।
प्रधानमन्त्री शाहको अभिव्यक्तिलाई भ्रष्टाचारविरोधी कारबाही तथा सम्भावित अनुसन्धानसँग जोडेर पनि विश्लेषण गरिएको छ। सरकारले भ्रष्टाचारविरुद्धको अभियानलाई प्रभावकारी बनाउने हो भने त्यसको आधार निष्पक्ष अनुसन्धान र कानुनी प्रक्रिया हुनुपर्ने देखिन्छ। राजनीतिक प्रतिशोधको आशंका उत्पन्न भएमा त्यसले सरकारको विश्वसनीयतामाथि प्रश्न उठाउन सक्छ।
राजनीतिक विश्लेषणका दृष्टिले गगन थापा र बालेन शाह दुवै युवा पुस्तामाझ परिवर्तन, सुशासन र नयाँ राजनीतिक संस्कृतिको अपेक्षासँग जोडिएका पात्र हुन्। थापा लामो संसदीय तथा पार्टीगत राजनीतिक अनुभवबाट आएका नेता हुन् भने शाह वैकल्पिक राजनीतिक शक्तिका रूपमा उदाएका नेता हुन्।
दुवै नेताबीच सहकार्य र संवादको सम्भावना रहँदा राजनीतिक परिवर्तनले गति लिन सक्ने भए पनि पछिल्लो वाक्युद्धले राजनीतिक ध्रुवीकरण बढाउने जोखिम देखाएको छ।
अब प्रधानमन्त्री शाह र कांग्रेस सभापति थापाबीचको यो टकराव संवाद र सहमतितर्फ अघि बढ्छ वा राजनीतिक संघर्षको नयाँ अध्याय सुरु हुन्छ भन्ने चासो बढेको छ।