काठमाडौं । नेपाली कांग्रेसका नेता अर्जुननरसिंह केसीले सत्तामा बसेर गरिने सीमित बहसले मात्र संविधान संशोधन सम्भव नहुने स्पष्ट पारेका छन्। उनले संविधान संशोधन जस्तो संवेदनशील विषयमा व्यापक राजनीतिक सहमति, जनताको सहभागिता र जिम्मेवार संवाद आवश्यक हुने बताए।
केसीका अनुसार संविधान संशोधन कुनै दल वा सत्ताको स्वार्थअनुसार अघि बढाउने विषय होइन। “संविधान सबै नेपालीको साझा दस्तावेज हो,” उनले भने, “त्यसैले संशोधन गर्दा प्रतिपक्ष, नागरिक समाज र सरोकारवाला सबै पक्षलाई विश्वासमा लिनुपर्छ।”
उनले सत्ता–प्रतिपक्षबीच आपसी अविश्वास बढ्दै जाँदा संशोधन प्रक्रिया थप जटिल बन्ने चेतावनीसमेत दिए। राष्ट्रिय मुद्दामा सहमतिको राजनीति नगरेसम्म संविधान संशोधन सफल नहुने उनको भनाइ थियो।
नेता केसीले संविधानका अपूर्णता सच्याउन खुला बहस, जिम्मेवार नेतृत्व र दीर्घकालीन दृष्टिकोण अपरिहार्य रहेको जोड दिँदै सबै दललाई सहकार्यको बाटो रोज्न आग्रह गरे।