काठमाडौं, साउन ५ । वैदेशिक रोजगार विभागअन्तर्गत ईपीएस कोरिया शाखाले रोजगार अनुमति प्रणाली (ईपीएस) मार्फत दक्षिण कोरियामा रोजगारीका लागि सञ्चालन हुने कोरियन भाषा परीक्षाको आवेदन खुला गरेको छ।
नेपाल र दक्षिण कोरियाबीच भएको समझदारीअनुसार यस वर्ष ७ हजार २०० जना नेपाली कामदार छनोटका लागि आवेदन आह्वान गरिएको हो। एचआरडी कोरियाले उत्पादनमूलक क्षेत्रमा ५ हजार, कृषि तथा पशुपालन क्षेत्रमा २ हजार, सेवा क्षेत्रमा १ सय र वन क्षेत्रमा १ सय जनाको माग पठाएको छ।
ईपीएस कोरिया शाखाका अनुसार २०२६ जुलाई २७ देखि अगस्ट २ सम्म अनलाइनमार्फत आवेदन दिन सकिनेछ।
आवेदकले ईपीएस कोरिया शाखाले तोकेको अनलाइन प्रणाली (EPS-TOPIK आवेदन पोर्टल) मार्फत व्यक्तिगत विवरण भरेर आवेदन दर्ता गर्नुपर्नेछ। आवेदनका क्रममा पासपोर्ट विवरण, व्यक्तिगत जानकारी र आवश्यक कागजात अपलोड गर्नुपर्नेछ। आवेदन पूरा भएपछि तोकिएको २८ अमेरिकी डलर बराबरको परीक्षा शुल्क बुझाउनुपर्नेछ। शुल्क भुक्तानी सफल भएपछि मात्र आवेदन मान्य हुनेछ।
पहिलो चरणमा कोरियन भाषा परीक्षा (EPS-TOPIK) सञ्चालन हुनेछ। भाषा परीक्षामा उत्तीर्ण भएकाहरूलाई दोस्रो चरणको सीप तथा कार्यक्षमता परीक्षणमा सहभागी गराइनेछ। दुवै चरण सफलतापूर्वक उत्तीर्ण गर्ने उम्मेदवारको नाम रोजगारदाताले छनोट गर्न सक्ने सूची (रोस्टर) मा समावेश गरिनेछ।
ईपीएस कोरिया शाखाका अनुसार अन्तिम परीक्षामा उत्तीर्ण उम्मेदवारको नतिजा दुई वर्षसम्म वैध रहनेछ। तर भाषा परीक्षा उत्तीर्ण गर्दैमा दक्षिण कोरियामा रोजगारी सुनिश्चित नहुने स्पष्ट पारिएको छ। अन्तिम रोजगारी रोजगारदाताको छनोट, स्वास्थ्य परीक्षण र अन्य ईपीएस प्रक्रियापछि मात्र सुनिश्चित हुने जनाइएको छ।