फिफा अध्यक्ष इन्फान्टिनोलाई वेल्सको झट्का, पुनःनिर्वाचनमा समर्थन फिर्ता

76.1k Shares

एजेन्सी । विश्व फुटबल महासङ्घ (फिफा) का अध्यक्ष जियानी इन्फान्टिनोको पुनःनिर्वाचन अभियानलाई वेल्स फुटबल एसोसिएसन (एफएडब्लु) ले समर्थन फिर्ता लिएको छ। विश्वकपमा निजी लगानी भित्र्याउने विवादास्पद प्रस्ताव असफल भएपछि सार्वजनिक रूपमा समर्थन फिर्ता लिने वेल्स पहिलो सदस्य राष्ट्र बनेको हो।

एफएडब्लुले सोमबार जारी गरेको विज्ञप्तिमा सन् २०२७–२०३१ कार्यकालका लागि इन्फान्टिनोको उम्मेदवारीलाई अब समर्थन नगर्ने स्पष्ट गरेको छ।

वेल्स फुटबल एसोसिएसनले सुशासन, निर्णय प्रक्रिया, नेतृत्व शैली, संस्थागत मूल्यमान्यता, हितधारकसँगको सम्बन्ध, सञ्चार प्रणाली तथा पछिल्ला केही निर्णयप्रति असन्तुष्टि जनाउँदै इन्फान्टिनोप्रतिको विश्वास गुमाएको उल्लेख गरेको छ।

विज्ञप्तिमा विश्व फुटबलको दीर्घकालीन हितलाई प्राथमिकतामा राख्न नेतृत्व असफल भएको आरोप लगाउँदै यही कारण समर्थन फिर्ता लिइएको जनाइएको छ।

यसअघि इन्फान्टिनोले फिफाका २११ सदस्य सङ्घलाई पुरुष र महिला विश्वकपसहितका प्रतियोगितामा निजी लगानी भित्र्याउने योजनालाई समर्थन गरे प्रत्येक सदस्य सङ्घलाई चार करोड अमेरिकी डलर उपलब्ध गराउने प्रस्ताव गरेका थिए। तर तीन महादेशीय फुटबल महासङ्घको कडा विरोधपछि उक्त योजना फिर्ता लिन बाध्य भएका थिए।

यता, इङ्ग्ल्यान्ड फुटबल एसोसिएसनले पनि फिफालाई पत्र पठाउँदै इन्फान्टिनोलाई अब समर्थन नगर्ने जानकारी दिएको छ। यसअघि उसले युरोपेली फुटबल महासङ्घ (युइएफए) को धारणा समर्थन गर्दै इन्फान्टिनोले युरोपेली फुटबल नेतृत्वको विश्वास गुमाएको जनाएको थियो।

उत्तर तथा मध्य अमेरिकी फुटबल महासङ्घ (कन्काकाफ) ले पनि फिफा नेतृत्वको व्यापक समीक्षा आवश्यक रहेको बताएको छ भने एसियाली फुटबल महासङ्घ (एएफसी) ले संगठनमा थप पारदर्शिता र जवाफदेहिताको आवश्यकता औँल्याएको छ।

फिफा अध्यक्षको अर्को निर्वाचन सन् २०२७ को मार्चमा मोरक्कोको रबाटमा हुने तय गरिएको छ।

सम्बन्धित समाचार