जोस (नाइजेरिया) । मध्य नाइजेरियाको नाइजर राज्यमा काम्बारी र फुलानी समुदायबीच भएको हिंसात्मक झडपमा २० जनाभन्दा बढीको मृत्यु भएको छ। स्थानीय सांसद र सुरक्षा स्रोतहरूले घटनाको पुष्टि गर्दै प्रभावित क्षेत्रमा तत्काल सुरक्षा बल परिचालन गर्न माग गरेका छन्।
बोर्गू संघीय निर्वाचन क्षेत्रका सांसद जाफर मुहम्मदका अनुसार पछिल्लो झडपमा विभिन्न जातीय समूह संलग्न रहेका छन्। उहाँले स्थानीय मिलिसियाबीचको सशस्त्र भिडन्तका कारण ठूलो मानवीय क्षति भएको र अवस्था नियन्त्रणमा लिन भारी हतियारसहित थप सुरक्षा फौज आवश्यक रहेको बताउनुभएको छ।
स्थानीय बासिन्दालाई उद्धृत गर्दै एएफपीले जनाएअनुसार फुलानी र काम्बारी समुदायबीच लामो समयदेखि तनाव रहँदै आएको छ। जिहादी समूहले फुलानी युवालाई आफ्नो संगठनमा भर्ती गर्ने प्रयास गरेपछि सरकारी फौज र स्थानीय मिलिसियाबाट प्रतिशोधात्मक आक्रमण हुने क्रम बढेको छ, जसको मार सर्वसाधारणले खेपिरहेका छन्।
नाइजर राज्य नाइजेरियाको प्रमुख कृषि क्षेत्रमध्ये एक हो। यहाँ वर्षौंदेखि गाईवस्तु चोरी, अपहरण र सशस्त्र गिरोहका आक्रमणका घटना भइरहेका छन्। पछिल्ला वर्षमा उत्तर–पूर्वमा सक्रिय जिहादी समूहहरूले यस क्षेत्रमा पनि प्रभाव विस्तार गर्दै स्थानीय अपराधी समूहसँग मिलेर हिंसात्मक गतिविधि बढाएको सुरक्षा विश्लेषकहरूको भनाइ छ।
गत मे महिनामा पनि यही क्षेत्र नजिकै सेनासँग सहकार्य गर्ने एक मिलिसिया समूहले करिब ४० जना फुलानी गोठालाको हत्या गरेको थियो। त्यस घटनापछि समुदायबीचको अविश्वास झन् गहिरिँदै गएको बताइएको छ।


