काठमाडौं । चिनियाँ राष्ट्रपति सी चिनफिङले सत्तारूढ चिनियाँ कम्युनिस्ट पार्टीभित्र अनुशासन कडा बनाउने तथा भ्रष्टाचार नियन्त्रण गर्ने अभियानलाई थप तीव्र बनाएका छन्। यसैक्रममा पार्टीका ३३ जना नेतामाथि कारबाही गरिएको छ।
बेइजिङमा सम्पन्न चिनियाँ कम्युनिस्ट पार्टीको केन्द्रीय समितिको पाँचौँ पूर्ण बैठकले पार्टीभित्र अनुशासन र सुशासन सुदृढ बनाउने विषयलाई प्राथमिकतामा राखेको छ। पार्टीका नेता तथा कार्यकर्ताले नेतृत्वका निर्देशन प्रभावकारी रूपमा कार्यान्वयन नगरेको, अनुशासन उल्लङ्घन गरेको र भ्रष्टाचारजन्य गतिविधिमा संलग्न भएको विषयलाई गम्भीरतापूर्वक लिइएको चिनियाँ सञ्चारमाध्यमले जनाएका छन्।
राष्ट्रपति सीले सन् २०१२ मा नेतृत्व सम्हालेदेखि नै भ्रष्टाचारविरुद्ध अभियान सञ्चालन गर्दै आएका छन्। उक्त अभियानअन्तर्गत पार्टी तथा सरकारी निकायका हजारौँ अधिकारीमाथि कारबाही भइसकेको छ। पछिल्लो अभियानले पार्टीभित्रको अनुशासन र नेतृत्वप्रतिको जवाफदेहितालाई थप कडा बनाउने संकेत गरेको छ।
सी चिनफिङको भ्रष्टाचारविरोधी अभियानले चिनियाँ सेनाको उच्च नेतृत्वलाई समेत प्रभावित पारेको छ। चिनियाँ सेनाको सर्वोच्च निकाय केन्द्रीय सैन्य आयोगका सात सदस्यमध्ये पाँच जना हटाइएका छन्।
सेनाका उच्च अधिकारीमाथि भएको कारबाहीले सैन्य नेतृत्वमा व्यापक फेरबदल ल्याएको छ। यसले सेनाभित्र भ्रष्टाचार नियन्त्रण र राजनीतिक अनुशासन कायम गर्ने राष्ट्रपति सीको प्रयासलाई देखाएको छ।
चिनियाँ कम्युनिस्ट पार्टीको पछिल्लो बैठकलाई आगामी नेतृत्व चयनको तयारीसँग पनि जोडेर हेरिएको छ। सन् २०२७ मा हुने पार्टीको २१औँ राष्ट्रिय महाधिवेशनअघि सीले पार्टीभित्र आफ्नो पकड थप मजबुत बनाउने प्रयास गरिरहेको विश्लेषण गरिएको छ।
विश्लेषकहरूका अनुसार पार्टीका महत्त्वपूर्ण पदमा नियुक्ति र नेतृत्व व्यवस्थापनलाई नियन्त्रणमा राख्नु सीको आगामी कार्यकाल सुनिश्चित गर्ने रणनीतिको हिस्सा हुन सक्छ। तर, उच्च तहका अधिकारीमाथि लगातार भइरहेको कारबाहीले पार्टी र सैन्य संरचनाभित्र नेतृत्व स्थायित्व तथा निर्णय प्रक्रियाबारे प्रश्नसमेत उठाएको छ।
चीनमा भ्रष्टाचार नियन्त्रणलाई शासन व्यवस्थाको प्रमुख प्राथमिकताका रूपमा अघि बढाइएको छ। पछिल्लो कारबाहीले पार्टीभित्र अनुशासन कायम गर्ने सीको अभियान अझै जारी रहने संकेत गरेको छ।