होर्मुज क्षेत्रमा फेरि तनाव चर्कियो, अमेरिका–इरान आमनेसामने

2.3k Shares

काठमाडौं । अमेरिका र इरानबीच सम्भावित सम्झौताको चर्चा चलिरहेका बेला खाडी क्षेत्रमा पुनः तनाव चर्किएको छ । विशेषगरी होर्मुज स्ट्रेट क्षेत्रमा अमेरिकी सैन्य कारबाही र त्यसको जवाफमा इरानले मिसाइल तथा ड्रोन आक्रमण गरेपछि स्थिति थप जटिल बनेको अन्तर्राष्ट्रिय सञ्चारमाध्यमहरूले जनाएका छन् ।

रिपोर्टअनुसार अमेरिकी सेनाले इरानसँग सम्बन्धित केही लक्ष्यमा आक्रमण गरेपछि इरानले यूएईस्थित सैन्य आधार तथा समुद्री क्षेत्रमा मिसाइल प्रहार गरेको दाबी गरिएको छ । यूएईले आफ्नो एयर डिफेन्स प्रणाली सक्रिय पारेर मिसाइल र ड्रोन अवरोध गरिरहेको जनाएको छ ।

अमेरिकी राष्ट्रपति डोनाल्ड ट्रम्पले घटनालाई सामान्य प्रतिक्रिया भन्दै प्रस्तुत गरे पनि इरानले अमेरिकी दबाबमा नझुक्ने संकेत दिएको छ । इरानी सैन्य अधिकारीहरूले अझै आफ्ना शक्तिशाली हतियार प्रयोग नगरेको चेतावनीसमेत दिएका छन् ।

अमेरिकी गुप्तचर निकायको मूल्यांकनअनुसार इरानसँग अझै ठूलो मात्रामा मिसाइल र लञ्चर मौज्दात रहेको बताइएको छ । यसले खाडी क्षेत्रमा युद्धको खतरा कायमै रहेको विश्लेषण गरिएको छ ।

होर्मुज क्षेत्रमा भएको पछिल्लो तनावपछि तेल आपूर्ति र समुद्री यातायातसमेत प्रभावित भएको छ । इरानले रणनीतिक समुद्री मार्ग बन्द गर्ने चेतावनी दिँदै आएको छ भने अमेरिकाले त्यहाँ आफ्नो सैन्य उपस्थिति बढाएको छ ।

यसैबीच साउदी अरब, यूएई, कतार र कुवेतजस्ता खाडी मुलुकहरू पनि सम्भावित द्वन्द्वको असरमा पर्न सक्ने चिन्ता बढेको छ । सुरक्षा विश्लेषकहरूले अमेरिका–इरानबीचको तनावले पश्चिम एसियालाई थप अस्थिर बनाउने जोखिम रहेको बताएका छन् ।

सम्बन्धित समाचार