एसईई नतिजा सार्वजनिक : ६५.९८ प्रतिशत विद्यार्थी उत्तीर्ण

1.7k Shares

काठमाडौं । राष्ट्रिय परीक्षा बोर्डले माध्यमिक शिक्षा परीक्षा (एसईई) २०८२ को नतिजा सार्वजनिक गरेको छ । यस वर्ष परीक्षामा सहभागीमध्ये ६५.९८ प्रतिशत विद्यार्थी उत्तीर्ण भएका छन् ।

बोर्डका अनुसार यसपटक उत्तरपुस्तिका परीक्षा केन्द्रमै परीक्षण गरिएको र प्रविधिको प्रयोग बढाइएकाले नतिजा एक महिनाभित्रै सार्वजनिक गर्न सम्भव भएको हो । परीक्षा नियन्त्रक टुकराज अधिकारीले त्रुटिरहित नतिजा प्रकाशनका लागि रुजु तथा प्राविधिक परीक्षणको काम तीव्र रूपमा गरिएको बताएका थिए ।

यस वर्ष एसईई परीक्षामा ५ लाख १२ हजार ४२१ विद्यार्थी सहभागी भएका थिए । जसमा नियमिततर्फ ४ लाख ४१ हजार ५६६ र ग्रेडवृद्धितर्फ ७० हजार ८५५ विद्यार्थी थिए ।

विद्यार्थीहरूले आफ्नो नतिजा राष्ट्रिय परीक्षा बोर्डको वेबसाइट, एसएमएस सेवा तथा विभिन्न अनलाइन प्लेटफर्ममार्फत हेर्न सक्नेछन् । Edusanjal, NEB र अन्य आधिकारिक पोर्टलमार्फत नतिजा उपलब्ध गराइएको छ।

एसईई नतिजामा सुधार : गत वर्षभन्दा ५ प्रतिशतले बढ्यो उत्तीर्ण दर

काठमाडौं । राष्ट्रिय परीक्षा बोर्डले सार्वजनिक गरेको माध्यमिक शिक्षा परीक्षा (एसईई) २०८२ को नतिजामा यस वर्ष उत्तीर्ण प्रतिशत उल्लेख्य रूपमा सुधार भएको छ । बोर्डका अनुसार यस वर्ष ६५.९८ प्रतिशत विद्यार्थी उत्तीर्ण भएका छन्, जुन गत वर्षको तुलनामा करिब ५ प्रतिशतले बढी हो ।

बोर्डले यसपटक उत्तरपुस्तिका परीक्षण प्रक्रियामा सुधार, परीक्षा व्यवस्थापनमा कडाइ तथा मूल्यांकन प्रणालीलाई थप व्यवस्थित बनाइएकाले नतिजामा सुधार आएको जनाएको छ । नियमित र ग्रेडवृद्धि गरी ५ लाखभन्दा बढी विद्यार्थी परीक्षामा सहभागी भएका थिए ।

यस वर्ष उच्च जीपीए ल्याउने विद्यार्थीको संख्या पनि बढेको छ । ३.६० माथि जीपीए ल्याउने विद्यार्थीको संख्या उल्लेख्य देखिएको बोर्डले जनाएको छ । यद्यपि, १ लाख ४६ हजारभन्दा बढी विद्यार्थी भने नन–ग्रेडेड (NG) भएका छन् ।

विद्यार्थीहरूले बोर्डको आधिकारिक वेबसाइट, एसएमएस सेवा तथा विभिन्न अनलाइन प्लेटफर्ममार्फत नतिजा हेर्न सक्ने व्यवस्था गरिएको छ ।

सम्बन्धित समाचार