बेल्जियमलाई हराउँदै स्पेन १६ वर्षपछि विश्वकपको सेमिफाइनलमा

2.8k Shares

काठमाडौँ । स्पेनले बेल्जियमलाई २–१ गोलले पराजित गर्दै फिफा विश्वकप फुटबलको सेमिफाइनलमा स्थान सुरक्षित गरेको छ। शनिबार बिहान लस एञ्जलस स्टेडियममा सम्पन्न क्वार्टरफाइनलमा स्पेनले अन्तिम समयमा निर्णायक गोल गर्दै अन्तिम चारमा स्थान बनाएको हो।

सन् २०१० मा विश्वकपको उपाधि जितेको स्पेन त्यसयता अपेक्षित प्रदर्शन गर्न सकेको थिएन। सन् २०१४ मा समूह चरणबाटै बाहिरिएको स्पेन २०१८ र २०२२ संस्करणमा अन्तिम १६ बाटै यात्रा टुंग्याएको थियो। तर यसपटक उत्कृष्ट लय कायम राख्दै १६ वर्षपछि पुनः सेमिफाइनल पुग्न सफल भएको छ।

स्पेनको जितमा फेबियन रुइज र मिकेल मेरिनोले एक–एक गोल गरे। बेल्जियमका चार्ल्स डे केटलेरले एक गोल फर्काए पनि टोलीलाई हारबाट जोगाउन सकेनन्।

खेलको ३०औँ मिनेटमा फेबियन रुइजले गोल गर्दै स्पेनलाई अग्रता दिलाएका थिए। पहिलो हाफको ४१औँ मिनेटमा चार्ल्स डे केटलेरले बराबरी गोल गरेपछि खेल १–१ को अवस्थामा पुगेको थियो।

खेल अतिरिक्त समयमा जाने संकेत देखिएको अवस्थामा ८८औँ मिनेटमा मिकेल मेरिनोले निर्णायक गोल गर्दै स्पेनलाई २–१ को रोमाञ्चक जित दिलाए।

अब स्पेनले फाइनल प्रवेशका लागि सेमिफाइनलमा फ्रान्ससँग प्रतिस्पर्धा गर्नेछ।

सम्बन्धित समाचार