काठमाडौँ। राष्ट्रियसभाको बैठक सुरु भएको छ । आजको बैठकमा विभिन्न विधेयकमाथि छलफल तथा प्रक्रिया अघि बढाउने कार्यसूची रहेको छ ।
बैठकमा सभाका सचिव तुलबहादुर कँडेलले ‘नेपाल विशेष सेवा ऐन, २०४२ को साविकको व्यवस्था जगाउनेसम्बन्धी विधेयक, २०८३’ का सम्बन्धमा प्रतिनिधिसभाबाट प्राप्त सन्देश सभासमक्ष टेबुल गर्नुहुने कार्यसूची रहेको छ ।
त्यस्तै, संस्कृति, पर्यटन तथा नागरिक उड्डयनमन्त्री खडकराज पौडेलले ‘आन्तरिक वायुसेवाको दायित्वसम्बन्धी विधेयक, २०८३’ राष्ट्रियसभामा पेस गर्नुहुनेछ ।
बैठकमा कृषि, वन तथा पर्यावरणमन्त्री गीता चौधरीले ‘सङ्क्रामक पशु रोग नियन्त्रण विधेयक, २०८३’ माथि विचार गरियोस् भन्ने प्रस्ताव प्रस्तुत गर्ने कार्यसूचीसमेत रहेको छ ।
सङ्घीय संसद्का महासचिव पद्मप्रसाद पाण्डेयका अनुसार आजको बैठकमा निर्धारित कार्यसूचीअनुसार विधेयकसम्बन्धी प्रक्रिया अघि बढाइनेछ ।
राष्ट्रियसभामा प्रस्तुत हुने विधेयकहरूले आन्तरिक हवाई सेवामा हुने दायित्व व्यवस्थापन तथा पशुमा फैलिन सक्ने सङ्क्रामक रोगको नियन्त्रणसम्बन्धी कानुनी व्यवस्थालाई अघि बढाउने अपेक्षा गरिएको छ ।
यसैगरी, नेपाल विशेष सेवासम्बन्धी विधेयकमा प्रतिनिधिसभाबाट प्राप्त सन्देश टेबुल भएपछि राष्ट्रियसभाको आगामी प्रक्रियाका लागि बाटो खुल्नेछ ।