खानी तथा खनिज विधेयकमा ३५ सांसदका २६७ संशोधन, मुख्य प्रस्ताव के–के ?
764
Shares
काठमाडौं । खानी तथा खनिज पदार्थ विधेयकमा ३५ जना सांसदले २६७ वटा संशोधन प्रस्ताव दर्ता गराएका छन्। सांसदहरूले विधेयकका विभिन्न प्रावधानमा संशोधन गर्दै खानी तथा खनिज पदार्थको उत्खनन, व्यवस्थापन, नियमन र राजस्व बाँडफाँटलाई थप व्यवस्थित बनाउनुपर्ने प्रस्ताव अघि सारेका छन्।
संशोधन प्रस्तावमा खानी तथा खनिज पदार्थको खोज, उत्खनन तथा उपयोग गर्दा वातावरणीय प्रभावलाई ध्यान दिनुपर्ने विषयलाई प्राथमिकता दिइएको छ। साथै प्राकृतिक स्रोतको संरक्षणसँगै स्थानीय तह र प्रभावित समुदायको हित सुनिश्चित गर्नुपर्ने माग पनि उठाइएको छ।
सांसदहरूले खानी सञ्चालनका लागि अनुमति दिने प्रक्रिया पारदर्शी बनाउन, राज्यको स्वामित्व तथा अधिकार स्पष्ट पार्न र निजी क्षेत्रको सहभागितालाई नियमन गर्नुपर्ने विषयमा पनि संशोधन प्रस्ताव गरेका छन्।
त्यस्तै, खानीबाट प्राप्त हुने राजस्वको उचित बाँडफाँट, स्थानीय समुदायलाई लाभको हिस्सेदारी, वातावरणीय क्षतिको क्षतिपूर्ति तथा खानी सञ्चालनपछि पुनःस्थापनाको व्यवस्था प्रभावकारी बनाउनुपर्ने प्रस्तावहरू पनि संशोधनमा समेटिएका छन्।
३५ सांसदबाट ठूलो संख्यामा संशोधन प्रस्ताव दर्ता भएपछि विधेयकमाथिको छलफल थप महत्वपूर्ण बनेको छ। सरकारले प्राकृतिक स्रोतको उपयोगबाट आर्थिक लाभ लिनेसँगै वातावरण संरक्षण र स्थानीय समुदायको अधिकारलाई कसरी सुनिश्चित गर्छ भन्ने विषय विधेयक पारित हुने क्रममा मुख्य चासोको विषय बनेको छ।