विराटनगर । कोशी प्रदेश सरकारले पर्यटन क्षेत्रको विकासका लागि ठूलो लगानी गरे पनि अपेक्षित रूपमा पर्यटन पूर्वाधार निर्माण हुन नसकेको बताइएको छ। प्रदेशका पर्यटन क्षेत्रलाई व्यवस्थित र प्रभावकारी बनाउन दीर्घकालीन योजना तथा ठूला पूर्वाधारमा केन्द्रित हुनुपर्नेमा जोड दिइएको छ।
कोशी प्रदेशका पर्यटनमन्त्री खिनु लाङ्वा लिम्बूले प्रदेशको पर्यटन विकासका लागि स्पष्ट मास्टर प्लान बनाएर अघि बढ्नुपर्ने बताएका छन्। उनले पर्यटनका नाममा छरिएर हुने लगानीभन्दा पर्यटकलाई आकर्षित गर्ने र प्रदेशको पहिचान झल्काउने पूर्वाधार निर्माणमा प्राथमिकता दिनुपर्ने धारणा राखेका छन्।
प्रदेशमा हिमाल, पहाड, धार्मिक तथा प्राकृतिक पर्यटनका महत्वपूर्ण सम्भावना रहे पनि आवश्यक पूर्वाधारको अभावका कारण त्यसको पूर्ण उपयोग हुन नसकेको बताइएको छ। विशेषगरी हिमाली क्षेत्रको सौन्दर्यलाई पर्यटनसँग जोड्दै पर्यटकले प्रत्यक्ष रूपमा हिमालको दृश्यावलोकन गर्न सक्ने संरचना निर्माण गर्नुपर्नेमा जोड दिइएको छ।
मन्त्री लिम्बूका अनुसार पर्यटन पूर्वाधार निर्माण गर्दा दीर्घकालीन प्रभाव, पर्यटक आकर्षण र आर्थिक प्रतिफललाई ध्यान दिन आवश्यक छ। त्यसका लागि प्रदेश सरकारले प्राथमिकताका क्षेत्र पहिचान गरी योजनाबद्ध रूपमा लगानी गर्ने तयारी गरेको छ।
कोशी प्रदेशमा पर्यटन क्षेत्रमा अर्बौं रुपैयाँ लगानी भए पनि त्यसअनुसारको प्रतिफल प्राप्त गर्न नसकेको अवस्थालाई सुधार गर्दै आगामी दिनमा व्यवस्थित र प्रभावकारी पूर्वाधार निर्माणलाई प्राथमिकता दिने बताइएको छ।