विराटनगर । सुनसरीको देवानगञ्ज गाउँपालिका–१ स्थित मध्यहर्साइमा गोली चल्दा एक जना युवक घाइते भएका छन्।
गोली लागेर घाइते भएका युवकलाई उपचारका लागि विराटनगरस्थित नोबेल अस्पताल ल्याइएको छ। उनको तिघ्रामा गोली लागेको जिल्ला प्रहरी कार्यालय सुनसरीका प्रवक्ता डीएसपी चन्द्रबहादुर खड्काले जानकारी दिएका छन्।
घाइते युवकको पहिचान भने खुलिसकेको छैन। स्थानीयबाट गोली चलेको सूचना आएपछि प्रहरी घटनास्थलतर्फ गएको थियो।
सुनसरीका प्रमुख जिल्ला अधिकारी ईश्वरी प्रसाद अर्यालका अनुसार घटनाको कारण अहिलेसम्म खुलेको छैन। घटनाबारे बुझ्न प्रहरी टोली परिचालन गरिएको उनले बताएका छन्। ‘गोली किन चल्यो भन्ने खुलेको छैन, प्रहरी घटनास्थलतर्फ गएको छ,’ प्रमुख जिल्ला अधिकारी अर्यालले बताएका छन्।
प्रहरीका अनुसार गोली कसले चलाएको हो र घटनाको पृष्ठभूमि के हो भन्नेबारे अनुसन्धान भइरहेको छ। घटनास्थलको अवस्थाबारे थप विवरण संकलन गर्ने काम भइरहेको प्रहरीले जनाएको छ।
गोली प्रहारको घटना भएको स्थान नेपाल–भारत सीमावर्ती क्षेत्र नजिक पर्छ। देवानगञ्ज क्षेत्रमा यसअघि पनि गोली चल्ने तथा सुरक्षा संवेदनशीलतासँग जोडिएका घटना भएका छन्। तर अहिलेको घटनालाई ती पुराना घटनासँग जोडेर हेर्नुपर्ने आधार भने तत्काल खुलेको छैन।
घटनाको थप अनुसन्धानपछि गोली चल्नुको कारण, संलग्न व्यक्तिहरू र घटनाको विस्तृत विवरण खुल्ने प्रहरीले जनाएको छ।