काठमाडौं । पूर्वप्रधानन्यायाधीश चोलेन्द्रशमशेर जबरालाई प्रहरीले आइतबार बिहान करिब ३ बजे महाराजगञ्जस्थित निवासबाट नियन्त्रणमा लिएर उपत्यका अपराध अनुसन्धान कार्यालय पुर्याएको छ।
अपराध अनुसन्धान कार्यालयबाट खटिएको प्रहरी टोली मध्यरातमा जबराको निवास पुगेको थियो। घरमा सबैजना सुतिरहेका बेला पुगेको टोलीले जबरालाई सुरक्षा चुनौती रहेको भन्दै आफूसँगै जानुपर्ने बताएको पारिवारिक स्रोतले जनाएको छ।
जबराले निवासमै सुरक्षाकर्मी थप गर्न आग्रह गरेका थिए। तर प्रहरी टोलीले पछिल्लो समय विभिन्न पक्षबाट सुरक्षा चुनौती रहेको भन्दै कार्यालयमै गएर कुराकानी गर्नुपर्ने बताएपछि उनी प्रहरीसँगै गएको बताइएको छ।
परिवारका अनुसार उनलाई नियन्त्रणमा लिँदा पक्राउ पुर्जी देखाइएको थिएन भने कुन आरोप वा उजुरीका आधारमा लगिएको हो भन्नेबारे पनि जानकारी दिइएको थिएन। केही घन्टापछि मात्रै जबरा प्रहरी नियन्त्रणमा रहेको खबर सार्वजनिक भएको थियो।
प्रहरी अधिकारीहरूले भने जबराविरुद्ध केही विषयमा उजुरी परेको बताएका छन्। तर तत्काल उजुरीको विस्तृत विवरण भने सार्वजनिक गरिएको छैन।
प्रहरीका केही अधिकारीका अनुसार जबरालाई नियन्त्रणमा लिन माथिल्लो तहबाट निर्देशन आएपछि टोली उनको निवास पुगेको थियो। तर, टोली परिचालन हुँदा उनलाई कुन विषयमा अनुसन्धान गर्ने वा के कारबाही अघि बढाउने भन्नेबारे तल्लो तहका प्रहरी अधिकारीलाई स्पष्ट जानकारी नभएको बताइएको छ।
उपत्यका अपराध अनुसन्धान कार्यालयका एसपी रामेश्वर कार्कीले भने जबरालाई सुरक्षा चुनौती देखिएपछि कार्यालयमा ल्याइएको बताएका छन्। उनका अनुसार जबरा सुरक्षित स्थानमा छन् र उनीविरुद्ध मुद्दा चलाउने विषय नरहेको बताइएको थियो।
तर, राज्यबाट पूर्वप्रधानन्यायाधीशका रूपमा सुरक्षा पाइरहेका जबरालाई कसबाट सुरक्षा चुनौती थियो भन्नेबारे प्रहरीले स्पष्ट पारेको छैन।
जबरालाई मध्यरातमा नियन्त्रणमा लिएर प्रहरी कार्यालय पुर्याइएको घटनालाई लिएर पूर्वन्यायाधीश तथा पूर्वप्रहरी अधिकारीहरूले प्रश्न उठाएका छन्।
पूर्वप्रधानन्यायाधीश ओमप्रकाश मिश्रले जबरालाई सुरक्षा चुनौती हुनुपर्ने कारण आफूले नदेखेको बताएका छन्। सुरक्षा चुनौती भए पनि उनको निवासमै थप सुरक्षाकर्मी परिचालन गर्न सकिने उनको भनाइ छ।
पूर्वन्यायाधीश तथा पूर्वप्रहरी अधिकारीहरूले कानुनी प्रक्रिया स्पष्ट नगरी रातको समयमा पूर्वप्रधानन्यायाधीशलाई नियन्त्रणमा लिएर जानु उचित नभएको धारणा राखेका छन्।
उनीहरूको भनाइमा राज्यका निकायले गर्ने यस्ता कारबाही पारदर्शी र स्पष्ट कानुनी आधारमा आधारित हुनुपर्छ। अन्यथा यसले सरकारप्रति अविश्वास बढाउने र न्याय क्षेत्रमा त्रासको सन्देश जाने जोखिम रहने उनीहरूको तर्क छ।
सर्वोच्च अदालतको इतिहासमा पूर्वप्रधानन्यायाधीश प्रहरी नियन्त्रणमा परेको यो पहिलो घटना भएको बताइएको छ। जबरा यसअघि महाभियोग प्रस्ताव, निलम्बन तथा विभिन्न न्यायिक निर्णयका कारण विवादमा आएका थिए।
जबरालाई नियन्त्रणमा लिनुको वास्तविक कानुनी आधार, सुरक्षा चुनौतीको स्रोत तथा उनीसँग सम्बन्धित उजुरीबारे प्रहरीले थप विवरण सार्वजनिक गर्न बाँकी छ।