काठमाडौं । प्रधानमन्त्री वालेन्द्र शाह ‘बालेन’ले आर्थिक अभावका कारण दसैँजस्तो महान् पर्व कसैका लागि बोझ बन्न नहुने बताएका छन्। बडादसैँको अवसरमा शुभकामना सन्देश जारी गर्दै उनले हरेक नागरिकको आर्थिक सम्पन्नताले मात्रै चाडपर्वको वास्तविक रौनक बढाउने उल्लेख गरेका हुन्।
प्रधानमन्त्री शाहले आर्थिक सम्पन्नता हासिल गर्दै देशलाई सुशासनको मार्गमा अघि बढाउन वर्तमान सरकार प्रतिबद्ध रहेको बताएका छन्। दसैँको शुभकामना सन्देशमा उनले नागरिकको सुखद जीविका, देशको समृद्धि र आर्थिक अवसर विस्तारलाई सरकारको प्राथमिकतासँग जोडेका छन्।
‘आर्थिक रूपमा हरेक नागरिकको सम्पन्नताले नै चाडपर्वहरूको रौनक अझै थपिन्छ। आर्थिक कारणले नै दसैँजस्तो महान् पर्व कसैका लागि बोझ बन्नु हुँदैन भन्नेमा हामी सचेत छौँ,’ प्रधानमन्त्री शाहले भनेका छन्।
उनले दसैँलाई धार्मिक तथा सांस्कृतिक पर्वका रूपमा मात्रै नभई पारिवारिक मिलन, आत्मीयता र सामाजिक एकताको अवसरका रूपमा व्याख्या गरेका छन्। देशभित्र तथा विदेशमा रहेका नेपालीलाई एकताबद्ध गर्ने बडादसैँले प्रत्येक घरमा उत्साह र उमङ्ग ल्याओस् भन्ने कामनासमेत उनले गरेका छन्।
प्रधानमन्त्री शाहले चाडपर्वका बेला परिवार र आफन्तसँग भेटघाट गरी खुसी साटासाट गर्नुपर्ने नेपालीहरू बाध्यताका कारण विदेशिनुपर्ने अवस्थाप्रति चिन्ता व्यक्त गरेका छन्।
रोजगारी र जीविकोपार्जनका लागि विदेश जानुपर्ने बाध्यताले नेपाली गाउँका घरआँगन रित्तिँदै गएको तथा चाडपर्वको रौनकसमेत कमजोर हुँदै गएको उनको भनाइ छ।
‘पारिवारिक मिलन र आफन्तजनको सामीप्यमा हर्षोल्लासका साथ मनाइनुपर्ने चाडपर्वहरू हिजोआज रित्ता र उजाडिँदै गएका गाउँका घरआँगनहरूमा निरस देखिँदै गइरहेको तीतो यथार्थलाई पनि यतिबेला म स्मरण गर्न चाहन्छु,’ उनले सन्देशमा उल्लेख गरेका छन्।
चाडपर्वमा घर फर्कने चाहना हुँदाहुँदै पनि आर्थिक तथा अन्य बाध्यताका कारण विदेशमै बस्नुपर्ने लाखौँ नेपालीको अवस्थालाई परिवर्तन गर्न सामूहिक प्रयास आवश्यक रहेको उनले बताएका छन्।
सरकार देशको समृद्धि र आमनागरिकको जीवनस्तर सुधारका लागि प्रतिबद्ध रहेको उल्लेख गर्दै प्रधानमन्त्री शाहले रोजगारी, आर्थिक अवसर र नागरिकको सुखद जीविकासँग जोडिएका समस्याको समाधानतर्फ अघि बढिरहेको बताएका छन्।
प्रधानमन्त्री शाहले यस वर्ष रसुवा, नुवाकोट र गोरखालगायतका जिल्लामा भएका विनाशकारी विपद्का कारण उत्पन्न शोकबीच दसैँ आएको स्मरण गरेका छन्।
विपद्मा ज्यान गुमाएकाहरूप्रति श्रद्धाञ्जली व्यक्त गर्दै उनले घाइतेहरूको शीघ्र स्वास्थ्यलाभको कामना गरेका छन्। साथै, शोकसन्तप्त परिवारप्रति समवेदना व्यक्त गर्दै विस्थापित नागरिकको पुनःस्थापनाका लागि सरकारले काम गरिरहेको जानकारी दिएका छन्।
विगतमा विनाशकारी भूकम्प, कोभिड–१९ महामारी तथा अन्य सङ्कटपूर्ण परिस्थितिका बीच पनि नेपालीहरूले आफ्नो धार्मिक, सांस्कृतिक र सामाजिक परम्परालाई निरन्तरता दिएको उल्लेख गर्दै उनले यस वर्षको दसैँलाई पनि एकता र आत्मीयताको अवसर बनाउन आग्रह गरेका छन्।
प्रधानमन्त्री शाहले दसैँलाई असत्यमाथि सत्य र आसुरी प्रवृत्तिमाथि दैवी शक्तिको विजयको प्रतीकका रूपमा उल्लेख गरेका छन्। उनले सामाजिक जीवनमा गलत प्रवृत्तिको अन्त्य गर्दै प्रत्येक व्यक्तिले आफूभित्र रहेका लोभ, क्रोध, ईर्ष्या र अहङ्कारजस्ता कमजोरीमाथि विजय हासिल गर्नुपर्ने बताएका छन्।
दसैँको धार्मिक तथा सांस्कृतिक महत्त्वलाई आत्मसात् गर्दै सत्य र सुशासनको मार्गमा अघि बढ्न उनले सबैलाई आह्वान गरेका छन्।
‘दसैँको अन्तर्यमा रहेको सत्यको विजयलाई आत्मसात् गर्दै सत्यको बाटोमा र सुशासनको बाटोमा हिँड्न माता दुर्गाभवानीको सत्प्रेरणा र कृपा हामी सबैमा सदैव परिरहोस्,’ प्रधानमन्त्री शाहले शुभकामना सन्देशमा भनेका छन्।
उनले बडादसैँका अवसरमा सम्पूर्ण नेपालीमा आरोग्य, सुख, शान्ति र समृद्धिको कामना गर्दै सभ्य र भव्य रूपमा पर्व मनाउन आग्रह गरेका छन्।
प्रधानमन्त्रीको सन्देशले दसैँको सांस्कृतिक र पारिवारिक महत्त्वसँगै आर्थिक अभाव, वैदेशिक रोजगारीको बाध्यता, गाउँघर रित्तिँदै गएको अवस्था तथा सुशासन र समृद्धिको आवश्यकतालाई पनि उजागर गरेको छ।