तिहार नजिकिएसँगै भक्तपुरको सूर्यविनायक नगरपालिका–७ स्थित गुन्डुका किसानलाई मखमली फूल टिप्न र माला गाँस्न भ्याइनभ्याइ भएको छ। तिहारमा विशेष महत्त्व राख्ने मखमली फूलको माग बढ्न थालेपछि स्थानीय किसान तथा गृहिणीहरू फूल टिप्ने, माला उन्ने र बिक्री गर्ने काममा व्यस्त भएका छन्।
गुन्डुका खेतबारी तथा घरआँगनमा ढकमक्क फुलेका मखमली र सयपत्री फूलले गाउँको वातावरण नै रंगीन बनेको छ। बिहानै बारीमा पुगेर फूल टिप्ने किसानहरू दिउँसो घरमै बसेर माला गाँस्ने काममा जुट्ने गरेका छन्।
विशेषगरी भाइटीकाका दिन दिदीबहिनीले दाजुभाइलाई मखमली फूलको माला लगाइदिने परम्परा रहेकाले तिहारमा यसको माग उच्च हुने गरेको छ। मखमली फूल लामो समयसम्म नओइलाउने भएकाले पनि यसको सांस्कृतिक तथा धार्मिक महत्त्व रहेको छ।
गुन्डु क्षेत्र व्यावसायिक फूलखेतीका लागि परिचित छ। यहाँका धेरै किसानले मखमली तथा सयपत्री फूलखेतीलाई आम्दानीको स्रोत बनाएका छन्। तिहारको समयमा काठमाडौं उपत्यकाका विभिन्न बजारबाट व्यापारीहरू फूल तथा माला खरिद गर्न किसानका घरमै पुग्ने गरेका छन्।
फूलखेती र माला निर्माणले स्थानीय किसान तथा महिलालाई घरमै बसेर आम्दानी गर्ने अवसरसमेत प्रदान गरेको छ। यद्यपि, उत्पादनको लागतअनुसार उचित मूल्य पाउनु र बजारमा फूलको माग कायम रहनु किसानका लागि महत्त्वपूर्ण विषय बनेको छ।