सेयर बजार ३३ अंकले बढ्यो, डेढ महिनायताकै उच्च कारोबार

1.9k Shares

काठमाडौं । नेपाली सेयर बजारमा उल्लेख्य सुधार देखिएको छ। नेपाल स्टक एक्सचेन्ज (नेप्से) परिसूचक ३३ अंकले बढेपछि बजारमा लगानीकर्ताको आकर्षण पुनः बढेको छ। पछिल्लो वृद्धिसँगै नेप्से परिसूचक डेढ महिनायताकै उच्च विन्दुमा पुगेको छ।

बजारमा आएको यो सुधारले पछिल्लो समय सेयर मूल्यमा उतारचढाव व्यहोर्दै आएका लगानीकर्तामा उत्साह थपेको छ। कारोबारमा आएको वृद्धि र विभिन्न कम्पनीका सेयर मूल्यमा देखिएको सुधारले बजारको समग्र गतिविधि बढाएको छ।

बुधबार नेप्से परिसूचक ३३.२९ अंकले बढेर २६६४ अंकमा पुगेको छ। कारोबार रकम ७ अर्ब ४५ करोड रुपैयाँ पुगेको छ, जुन भदौ ३० यताकै उच्च हो।

 

जलविद्युत् समूहमा सबैभन्दा धेरै वृद्धि

बुधबार २४१ कम्पनीको सेयर मूल्य बढेको छ भने ३५ कम्पनीको घटेको छ। तीन कम्पनीको मूल्य स्थिर रह्यो। अघिल्लो दिन ५ अर्ब ८० करोड रुपैयाँको कारोबार भएकोमा यस दिन कारोबार रकम बढेर ७ अर्ब ४५ करोड रुपैयाँ पुगेको हो।

समूहगत सूचकतर्फ जलविद्युत् समूह सबैभन्दा धेरै २.०६ प्रतिशतले बढेको छ। व्यापार समूहबाहेक अन्य सबै समूहका सूचकमा वृद्धि देखिएको छ। व्यापार समूह भने ०.४४ प्रतिशतले घटेको छ।

बैंकिङ समूह १.३६ प्रतिशत, विकास बैंक १.११ प्रतिशत, फाइनान्स १.५५ प्रतिशत, होटल तथा पर्यटन १.३४ प्रतिशत, लगानी १.५२ प्रतिशत र जीवन बीमा समूह १.५९ प्रतिशतले बढेका छन्।

 

बेनी हाइड्रोपावरको मूल्य १५ प्रतिशत बढ्यो

यस दिन बेनी हाइड्रोपावरको सेयर मूल्य सबैभन्दा धेरै १५ प्रतिशतले बढेको छ। बुटवल पावरको मूल्य १०.६० प्रतिशत, सुपर खुदी हाइड्रोपावरको ६.२६ प्रतिशत र एनआरएन इन्फ्रास्ट्रक्चरको ६.२२ प्रतिशतले वृद्धि भएको छ।

त्यस्तै, युनियन हाइड्रोपावर, सान्जेन, स्वस्तिक लघुवित्त र होटल फरेस्ट इनको सेयर मूल्यमा पनि उल्लेख्य वृद्धि देखिएको छ। अर्कोतर्फ, सिर्जनशील लघुवित्त, चिरख्वा हाइड्रोपावर र माथिल्लो मैलुङखोलाको मूल्य घटेको छ।

कारोबार रकमका आधारमा लिबर्टी इनर्जी, घलेम्दी हाइड्रोपावर, बुटवल पावर, अपि पावर, सोलु हाइड्रोपावर, ग्रिन भेन्चर्स, पिपुल्स हाइड्रोपावर, सानिमा बैंक, सानिमा मिडिल तमोर र कुमारी बैंक अगाडि रहेका छन्।

 

सेयर बजारमा परिसूचक र कारोबार रकम दुवै बढ्नुले लगानीकर्ताको सक्रियता बढेको देखाएको छ। यद्यपि, बजारको आगामी दिशा भने कम्पनीहरूको वित्तीय अवस्था, लगानीकर्ताको मनोविज्ञान र समग्र आर्थिक परिस्थितिमा निर्भर रहनेछ।

सम्बन्धित समाचार