काठमाडौं । विश्वकै ठूलो क्रिप्टोकरेन्सी कारोबार प्लेटफर्ममध्ये एक बाइनान्समा भएको करिब ६ अर्ब ३० करोड अमेरिकी डलर बराबरको क्रिप्टोकरेन्सी चोरीमा उत्तर कोरियाली ह्याकरहरूको संलग्नता रहेको अमेरिकी संघीय अनुसन्धान ब्युरो (एफबीआई) ले जनाएको छ ।
एफबीआईका अनुसार सन् २०२६ अक्टोबर २९ मा भएको साइबर आक्रमण उत्तर कोरियासँग सम्बन्धित ‘ट्रेडरट्रेटर’ नामक ह्याकर समूहले गरेको हो । यस समूहलाई उत्तर कोरियाली राज्यसमर्थित साइबर गतिविधिसँग जोडिएको बताइएको छ ।
ब्लकचेन अनुसन्धान संस्था टीआरएम ल्याब्सका अनुसार ह्याकरहरूले बाइनान्सका विभिन्न १० वटा ब्लकचेन नेटवर्कबाट करिब ६ अर्ब ३६ करोड डलर बराबरका डिजिटल सम्पत्ति चोरी गरेका थिए ।
आक्रमणको मुख्य हिस्सा करिब २० मिनेटभित्र सम्पन्न भएको अनुसन्धानकर्ताहरूले बताएका छन् । चोरी गरिएका सम्पत्तिमा बिटक्वाइन, इथेरियम तथा अमेरिकी डलरसँग मूल्य स्थिर राख्ने टेथर र यूएसडीसीजस्ता डिजिटल मुद्रा रहेका छन् ।
साइबर आक्रमणकारीले बाइनान्सको आन्तरिक प्रणालीमा पहुँच बनाएर अनधिकृत कारोबार गरेको प्रारम्भिक अनुसन्धानबाट देखिएको छ । कम्पनीका अनुसार एक कर्मचारीको ल्यापटपमा पहुँच स्थापित गरी दुर्भावनापूर्ण सफ्टवेयर प्रयोग गरिएको हुन सक्ने आशंका छ ।
एफबीआईले चोरी भएको डिजिटल सम्पत्ति मुख्यतः इथेरियममा रूपान्तरण भइरहेको जनाएको छ । ह्याकरहरूले रकमको स्रोत लुकाउन विभिन्न डिजिटल वालेट, विकेन्द्रीकृत वित्तीय प्लेटफर्म र क्रिप्टोकरेन्सी साट्ने सेवाहरू प्रयोग गर्न सक्ने चेतावनी पनि दिएको छ ।
एफबीआईले क्रिप्टोकरेन्सी एक्सचेन्ज, ब्लकचेन सञ्चालक, वित्तीय सेवा प्रदायक तथा डिजिटल मुद्रा कारोबारसम्बन्धी संस्थालाई चोरीसँग सम्बन्धित वालेट ठेगानाबाट हुने कारोबार रोक्न आग्रह गरेको छ ।
अमेरिकी गोप्य सेवा र आन्तरिक राजस्व सेवाको अनुसन्धान शाखासँग समन्वय गरेर चोरी भएको रकमको कारोबार निगरानी भइरहेको एफबीआईले जनाएको छ ।
घटनापछि बाइनान्सले ग्राहकको सम्पत्तिमा परेको प्रभाव बेहोर्न कम्पनीकै स्रोतबाट रकम व्यवस्थापन गर्ने जनाएको छ ।
कम्पनीका अनुसार चोरी भएको रकममध्ये करिब ९० प्रतिशत बराबरको सम्पत्ति पुनः खरिद तथा व्यवस्थापन गर्न ६ अर्ब डलरभन्दा बढी रकम छुट्याइएको छ । बाँकी सम्पत्ति कम तरल प्रकृतिका भएकाले व्यवस्थापन गर्न थप समय लाग्न सक्ने कम्पनीले जनाएको छ ।
चोरी भएका केही सम्पत्ति विभिन्न क्रिप्टोकरेन्सी जारी गर्ने संस्थाको सहयोगमा रोक्का गरिएको छ । शुक्रबारसम्म करिब ३ अर्ब डलर बराबरका सम्पत्ति पहिचान तथा रोक्का गरिएको विवरण सार्वजनिक भएको थियो । ग्राहकको निकासी सेवा अस्थायी रूपमा रोकिएकोमा आइतबारदेखि पुनः सञ्चालन गर्ने तयारी रहेको पनि बाइनान्सले जनाएको छ ।
उत्तर कोरियासँग सम्बन्धित ह्याकर समूहहरू यसअघि पनि विभिन्न क्रिप्टोकरेन्सी प्लेटफर्ममा भएका ठूला साइबर आक्रमणमा जोडिँदै आएका छन् । सन् २०२५ मा बाइबिट एक्सचेन्जबाट करिब १ अर्ब ५० करोड डलर बराबरको क्रिप्टोकरेन्सी चोरी भएको घटनामा पनि सोही समूहको संलग्नता रहेको अमेरिकी अनुसन्धानकर्ताहरूले बताएका थिए ।
बाइनान्समा भएको पछिल्लो घटनालाई डिजिटल सम्पत्ति चोरीको अहिलेसम्मकै ठूलो घटनामध्ये एक मानिएको छ । यसले विश्वव्यापी क्रिप्टोकरेन्सी कारोबारको सुरक्षा, ग्राहकको सम्पत्ति संरक्षण र डिजिटल वित्तीय प्रणालीको विश्वसनीयतामाथि गम्भीर प्रश्न उठाएको छ ।