धादिङ । पृथ्वी राजमार्गअन्तर्गत चितवनको बेनीघाट रोराङ गाउँपालिका–९ स्थित मझिमटार खण्डमा भोलि (कात्तिक १६ गते सोमबार) तीन घण्टा सवारी आवागमन पूर्ण रूपमा बन्द हुने भएको छ ।
नागढुंगा–मुग्लिङ सडक योजना (पश्चिम खण्ड), मुग्लिङले सूचना जारी गर्दै आकाशे पुल निर्माण तथा सडक स्तरोन्नतिको कामका लागि उक्त सडकखण्ड बन्द गर्न लागेको जनाएको हो ।
योजना कार्यालयका अनुसार कात्तिक १६ गते बिहान ११ बजेदेखि दिउँसो २ बजेसम्म मझिमटारस्थित पृथ्वी राजमार्ग भएर सञ्चालन हुने सबै प्रकारका सवारीसाधनको आवागमन पूर्ण रूपमा रोक लगाइनेछ ।
निर्माण कार्य सुरक्षित र व्यवस्थित रूपमा सम्पन्न गर्न उक्त अवधिमा यातायात बन्द गर्न लागिएको कार्यालयले जनाएको छ ।
सडक योजना कार्यालयले निर्धारित समयमा यात्रा गर्ने सवारीचालक तथा यात्रुलाई वैकल्पिक मार्ग प्रयोग गर्न आग्रह गरेको छ ।
त्यसैगरी, यात्राका क्रममा प्रचलित ट्राफिक नियम तथा सडक अनुशासन पूर्ण रूपमा पालना गर्न र सम्बन्धित निकायले जारी गर्ने सूचनालाई ध्यान दिन पनि अनुरोध गरिएको छ ।
तीन घण्टाको काम सम्पन्न भएपछि उक्त सडकखण्डमा सवारी आवागमन पुनः सञ्चालनमा आउने अपेक्षा गरिएको छ ।