कांग्रेस एमाले समर्थित गठबन्धनलाई पराजित गर्दै सागर पाण्डे टानको अध्यक्षमा निर्वाचित

भाद्र १८, काठमाण्डौं । ट्रेकिङ एजेन्सिज एसोसिएसन अफ नेपाल (टान) को अध्यक्षमा सागर पाण्डे निर्वाचित भएका छन् । बर्तमान सरकार समीकरणमा रहेका नेपाली कांग्रेस र ने.क.पा. एमालेको समर्थन पाएका उम्मेदवार राजेन्द्र सापकोटालाई पराजित गर्दै माओवादी केन्द्रका सागर पाण्डे अध्यक्षमा निर्वाचित भएका हुन् । पाण्डेले ५८० मत पाएर विजयी हुँदा पराजित भएका सापकोटाले ४८० मत पाएका छन् ।

त्यस्तै वरिष्ठ उपाध्यक्षमा कर्मा शेर्पा निर्वाचित भएका छन् भने महासचिवमा सोनाम ग्याल्जेन शेर्पा निर्वाचित भएका छन् । महासचिवमा निर्वाचित शेर्पा पाण्डे समूहकै हुन् । वरिष्ठ उपाध्यक्षमा भने पाण्डे समूहका चोलेन्द्र कार्की पराजित भएका छन् ।

सोमबार सम्पन्न भएको निर्वाचनबाट टानको सचिवमा सचिव रिञ्जी जाङबु शेर्पा, कोषाध्यक्षमा गौतम राज वाग्ले र सहकोषाध्यक्षमा लाक्पा तेम्बा शेर्पा निर्वाचित भएका छन् ।

निर्वाचनबाट टानको सदस्यमा पवित्रा तामाङ, अम्बिर बहादुर गुरुङ, विनोद तामाङ, होम बहादुर विश्वकर्मा, फुर्पु छिरिङ ल्होमी (भोटे) सदस्यमा निर्वाचित भए ।